寒秋的生命力

目睭一睨日誌紙已經掀到十一月底，透早起床常常看到外面結一層白白的霜，身軀已經換穿phon-se衫（華語：毛衣），樹頂的葉仔落kap差不多，溫哥華也漸漸beh進入落雨多多的冬天。頂禮拜六遇到好天，想講真久無hip相，就一個人揹起相機去Richmond Nature Park。入秋的Nature Park看起來真悽涼，因為tu-tu落過雨，土腳真濕真軟，四界攏有水窟，要真小心行。我一個人沿裡面的小路行一圈，可能因為功夫無夠，加上本身無什麼藝術感受，無hip到什麼通看的相。

轉來到入口的所在，有一塊小空地，公園有設立一koa設施放水kap飼料乎園內的鳥仔通食，有真多雀鳥仔佇彼找物食，也同時看到一隻phon鼠（華語：松鼠）爬上爬落teh食飼料。這是真好的機會，第一擺佇這呢好的天氣擱這呢近通hip phon鼠，隨時將相機提出，換望遠的鏡頭，hip幾十張，以下是我感覺hip了boe歹的：





也有hip到一koa美洲的山雀：
心內感覺一絲絲意外也真感動，佇看起來天氣漸漸寒冷，萬物teh-beh進入休眠的秋天，猶擱看e到雀鳥仔自在teh飛、享受食物，也看到phon鼠食樹子時古錐的模樣，擱再一擺乎我感受到秋天的媠kap上帝對萬物的愛疼。感謝上帝，連phon鼠kap雀鳥仔伊攏看顧，乎 in 呣免煩惱食穿，咱只要信靠上帝，就算講佇寒冷的秋冬，也會有由上帝來的生命力，咱擱有什麼好煩惱、驚惶呢？

（這是我頭一擺試用河洛話寫文章，寫一koa簡單ê物，加上chin前hip的幾張相片。若無漢字通用就寫白話字，我的白話字可能無一定完全正確，但是打拼學習中！）