攏是好天氣

此幾日溫哥華落雪，雖然呣是今年第一擺，但是此擺落了兩日，雪也真大。有機會用我的DSLR第一擺hip雪，是新的hip相的挑戰。但是也是因為這擺的雪，使我有機會hip得「雪中紅」這個主題，是正港親像歌詞裡面所講的『只有玫瑰雪中紅』。

住佇溫哥華，落雪的機會無多，每一擺落雪，無幾日就消融。也因為按呢，我真珍惜每一擺的雪。我感覺雪真清白、真嫷，雪所蓋著的大地，親像披一niaⁿ白色的新娘衫，世界也若天堂一樣。普通時車駛過點仔膠路，車輪kau過的聲真大，但是佇雪鋪滿的路面，車駛過時攏是靜靜的，加上暗暝時的路燈光線的氣氛，世界運轉的腳步隨時慢落來，外面的天氣雖然寒冷，但是心裡卻有一種真平安的感覺。

昨暗佇教會團契中，有兄姊提起講外面落大雪，天氣真歹。我直teh想，落雪豈真正是歹天氣？是啊，落雪的時，路面真kut（華語：滑），使咱出門真無方便，也常常因為按呢，造成交通意外、出車禍。Tiaⁿ-tiaⁿ也聽人講，落雨的時天氣真歹，無法度享受日頭，但是豈因為按呢，咱就講落雪亦是落雨是歹天氣？

我感覺，落雪的時真好，若頭前講的，真嫷、真平安。閣卡重要的，呣管是落雪、落雨、透風、出日，攏是大自然的規律，也是萬物一冬過一冬繼續佇地球生存的原因。如果若tak-kang出日，無落雨，青草樹木就無水通吸收長大，咱人kap真多動物也就無菜蔬果子通食；若無四季的變換，真多生物就無通有息睏，也無通一冬比一冬擱卡勇壯；若無寒冷的冬天，咱佇春天就無美麗的鬱金香kap櫻花通欣賞。

四季kap氣候是上帝所定，凡若是上帝創造的，佇創世紀有講『上帝看伊是好』。傳道書也有講，『天下萬般攏有伊的期，萬項事攏有伊的時』(3:1)，閣講，『上帝造萬物，各照伊的時成做美妙』(3:11)。因為按呢，我知影通聽見到落雨時大自然美妙的音樂、看見到落雪時純潔清白的大地、感受到出日時溫暖的日光。

因為上帝的恩典，呣管甚麼款的氣候，攏是好天氣。